Tunbridge wells 租樓記

最近除左去Epsom 成功租樓外，呢幾日去咗Tunbridge wells, Kent 睇咗兩個properties 就成功租到！Tunbridge Wells 既官方名係Royal Tunbridge Wells，倫敦既東南面。呢個地方自十七世紀以來都有名氣，以前係因為佢係個spa town, 有啲貴族用過呢度既泉水後話可以醫病。因為celebrity 效應所以吸引咗越來越多有錢人去，帶旺當地旅遊業，連King Charles I 既老婆都有去做spa retreat, 就係咁，喺1909年，Tunbridge Wells 獲得了Royal 銜頭 (全英格蘭只有三個town 得此殊榮)。

今時今日，呢個地方吸引咗想喺倫敦返工但唔想喺倫敦住既年輕人同家庭。我比較喜歡Tunbridge wells 既山景同自然境色。可能喺香港長大，成日都見到山，所以好有親切感？起初住倫敦都唔覺，直到中間搬咗去愛丁堡，見到啲連綿既山景，就覺得山景真係超靚。不過，蘇格蘭既山同Kent 既山完全不能比較，前者之高會令我心存敬畏，後者會覺得綠油油，配上一座教堂尖頂，好可愛。

今次租成既係離火車站行路15分鐘既兩房flat，喺landlord親自見我地既，仲同我地邊傾邊睇成個鐘。呢間flat 既樓底好高，廳既其中兩面有大既玻璃窗，令到陽光好充足，兩間房既空間都好大，特別係主人房，en suite bathroom, 兩個大既built in 衣櫃。全屋用down lights, 令到室內夜晚都會好光好warm。個landlord 好健談，對香港好有興趣，仲竟然知Apple Daily 無咗呢件事，仲話，如果係佢，佢都會走，所以好明白點解香港人要過黎。

呢次睇樓感覺好，第二日即落offer, 一切都好順利。最近因為幫另一個客喺Tunbridge Wells 買樓，所以都去咗好幾次，想住London commuter towns 既真係可以考慮下！