St Albans 租樓後續 | 寵物移英租屋篇

幾個星期前寫咗一篇<St Albans 租樓記>喺我地第一個trip, 最終雖然有幫客人落第一間屋既offer, 但連同我們落既，個landlord 收到6個offers ，最終無揀到我地既客人。而另一間屋因為去到同相差好遠，無落到offer, 第一個trip 空手而歸。

之後既每一日我早上9:00就𥄫住啲盤，一有合適就試約viewing。因為客人有狗狗，好多landlord 都不太願意租 (喺有其他租客選擇既情況下), 去到一個位，連個客都話st Albans 難租既話，不如試第二區，但我對幫佢地租st Albans還是很有信心，最終喺失敗後既一星期再去second trip。

今次約咗睇4間，但去既途中收到其中一間經紀打黎，問我係咪有狗，我話係呀，而且我有問過你，你話個landlord 上一手個租客都養狗，所以ok 我先約 viewing, 佢話sorry 呀，個landlord 手上有兩個offers, 都係無pets 既，我話但我個客既肯俾12個月租upfront, 如果喜歡又可能會俾高過asking price, 而且我地都喺火車上了。最後都喺連睇都唔俾我地去睇。

一大早就有挫折，我唔想令客人難受，決定睇完第一間先再同佢講第二間被取消。第一間屋其實好靚，屋外門上有一種淺紫色花，剛好長到好似一個拱門。但屋內既master bedroom 有mould同damp既痕跡，bathroom 都有啲瓷磚有裂，呢啲我地都寫哂offer form 要求處理。

第二間屋我地本身知道競爭激烈，個經紀話有幾個香港人都話可以12 month rent upfront。屋內modern feel, 但第二個bedroom 竟然無門，而且偏細，間屋亦偏暗，但由於pet negotiable, 所以客人想照落offer，亦比asking price 高。值得一提既係個agent 好talkative, 知道好多香港人黎又講下香港情況，係個friendly 但講野停唔到既中年大叔😊

第三間屋係第一間屋同一個agent show 俾我地睇既，個agent 係個30歲左右既女性，又係好friendly ，而佢之前喺電話同我溝通既時候已好好，知道我之前有viewing, 會趕得好辛苦黎睇最後呢間，所以俾我約遲15分鐘。間屋個size 算大，master bedroom 有自己既浴室，地下有客厠，樓上仲有一個common bathroom, 一家三口完全不用爭厠所😂。Garden 無第一同第二間靚，但可以接受。有自己既泊車位，屋內很光猛，步行5分鐘有個大型超市。而且，喺一間好中學旁邊(因為之前個客搵我地做過research, 我們對st Albans 既學校都熟識，都知好學校既區喺邊)。

三間屋，三個offers, 都高於本身既asking price, 大家估下最終我們邊間得咗？

聽日5月20號英國時間上午6時，我地要到Heathrow Airport 接機。今次要接既就係之前通過我地幫手喺St Albans 租到樓既一家三口加狗狗🐶。好開心終於可以見面啦！