英國過年

上年過年喺香港，叫做係結婚第一年返去派利是，對人黎講，過年好多活動都同佢地既Christmas 有啲似, 例如聖誕要買聖誕樹，過年要買年花; 聖誕要送禮，過年要派利是; 英國聖誕要見家人、食、宅在家，過年都係差唔多。

當然都有啲唔同。未結婚前男友陪我返香港收到利是會即刻拆，因為英國收禮好多時會即時拆的，包括生日禮物呀、咭呀等等，所以要同佢講唔好當住俾利是既人前拆!

英國過聖誕好多家庭會玩下board game, 香港過年係會打麻雀。喺打麻雀方面，近呢幾年老公有少少進步，唯一係萬字都係要我幫手，先寫哂一到九既英文順序出黎，東南西北中發白都大致認到，唔會碰錯 。

依家老公覺得農曆過年完全無難度, 收利是、派利是要講恭喜發財，呢句佢都講得幾好，打麻雀又叫做識識地，不過過年大部分時間佢只需要食，大家講廣東話佢又唔識聽，所以應該無咩壓力。

往年喺倫敦過農曆年會去Chinatown 飲個茶，交換下利是，今年lockdown 無得去。希望大家喺香港過個好年，又或者得閒買定啲常用揮春、利是封黎英國備用？話說香港賣嗰啲真係靚好多呀！

想知英國聖誕習俗，請閱【平安夜的思念】 、【聖誕樹的祈願】 、【買聖誕樹注意事項】 。