再見蘋果

無論幾唔想，聽日都要同一份陪伴咗香港人好多年既報紙講再見。

對呢份報紙最初既印象係阿公帶我返鄉下，到羅湖過關前同我講，呢份報紙唔可以帶入大陸，於是掉了，睇睇垃圾桶，原來都有好幾份。作為小朋友既我，呢個係我對呢份報紙既第一印象，唔係好明點解唔帶得，又唔係好明點解得呢份唔帶得。

細個屋企會用報紙鋪枱食飯，屋企有人睇成報、有人睇蘋果，我最喜歡一路食飯，一路低頭睇某一格既報紙，有時係社評，有時係馬經。年年月月日日，似乎塑造咗今日既人生觀同價值觀。

蘋果呢份報紙第二個令人印象深刻既地方係遊行時佢一整頁既遊行標語，相信好多人都用過，係社會運動中不可或缺既又帶象徵意義既一部分。

所以，今日無咗蘋果一啲都唔出奇。出奇既係經歷咗咁多，得到呢個消息仍然會難過，無期望就無失望，麻木了就應該唔會再有感覺，但原來仍然會如此難受。

倫敦落咗好幾日雨，今日天氣好，藍天白雲。天下之大，總有容身之所。