馬肉/打針與信任

最近陸續都有港人收到visa, 好為佢地高興！今日想講下我住喺英國呢幾年既一個反思。跟開我既post 都知我先生係英國人，一齊咗咁耐總有啲時候我會諗「如果我有佢咁既經歷就好啦」，有啲係好小事，例如，「如果我知多啲英國流行文化就好啦」，但有一件事我係真係非常羨慕我先生或者英國人的，就係對政府既嗰種信任。

2013年黎英國，當時發生一件大事，就係馬肉事件，英國人發現有啲肉類產品加咗馬肉但無商品説明，即係食咗都唔知。當時先生以及佢既家人朋友講起呢件事都好憤怒，有被欺騙既感覺。我當時既反應係好平淡，心諗地溝油你聽過未？假雞蛋你聽過未？我問我先生，點解你咁大反應？難道你平時唔會咩都質疑下政府咩？然後我地既對話令我了解到一件事，就係我地既思考方法完全唔同。

喺香港長大既我，咩都會先質疑下先，無計，經驗教曉我地咁做。喺英國長大既佢，對政府（即使非佢支持既執政黨）係有很基本既、自然既信任，相信呢個system 係為民服務的，係有公信力同透明度的。而我發現呢種亦非盲目既信任，比如某些高官、貴族做咗啲咩衰事，又get away, 佢哋英國人都係知有利益輸送呢件事，但普遍係覺得呢個system 係work 既，係目前最公平的。

呢個認知對我既衝擊其實好大。原來係咁既文化環境長大既人同我睇同一件事可以咁唔同。呢種自然存在既信任係我所沒有既。喺英國講起階級硏究，有一句好有名既，就係class 或者品味，喺無既人需要努力先show 到俾人睇，而真正elites class 既人喺唔需要用力，no effort, 就已擁有而無咩自覺。其實就好似對system 既信任一樣，無需政治slogan ，英國人骨子裏就有，仲會不經意地流出。

最近同家人講起香港打針同英國打針，大家既睇法唔同，令我回想起馬肉事件當年俾我既衝擊，特別係呢份信任，令我覺得英國人其實真係幾令人羨慕，我可能一世都學唔黎（因為無得學），但如果有下一代香港人喺呢度長大可能佢地既經驗又會唔同呢😊