醫院呢件事

之前寫過一篇關於喺英國睇醫生的，今次想講下醫院。黎咗英國咁多年，睇醫生有，但醫院係比較少去的，A&E 去過兩次，一次係朋友有咗，突然有啲情況；一次係先生受傷；一次喺倫敦，一次喺愛丁堡。整體感覺還是不錯的，先生受傷嗰次喺倫敦，雖然等咗3個鐘，我帶咗本書去睇，好記得有個老婆婆又係睇緊書，問我睇咩，閒聊咗一陣，然後見到啲被送入黎A&E既醉鬼，相視一笑。愛丁堡嗰次，因為朋友懷孕，基本上係top priority, 等咗5分鐘即刻有得見。兩次既感覺都不錯，醫生、護士都好好。

最近因為家人患病既關係，去咗South West London 一間醫院探病。最近倫敦雖然感染COVID 既人數有上升，但慶幸係特殊情況下仍可探病，對病人同家屬尤其重要。雖然有去過A&E既經驗，但真係上病房比較少。我既家人對呢間醫院一直都係有讚既，因病情引起既種種問題同不適，呢間醫院一直都提供到好好既幫助。我無數次慶幸佢住喺呢區，能夠用到呢間醫院。聽其他朋友講，英國醫院質素都可以好參差，同資源問題有關。但我既朋友同我都好彩地不算有咩經驗，而好多時一間醫院、一個gp 好唔好，都好主觀，都要睇個病人有幾病，需要咩服務等等。有個website 係based on 病人填既survey 結果去比較GP 既質素，有興趣可以去睇下 http://www.gp-patient.co.uk ，可能對你決定register 邊間GP 有幫助？不過，好老實講，呢種survey 我都填過，真係幾主觀，所以如果無咩要求，選擇離自己屋企最近既GP係最方便。

入到病房，感覺上都幾多Asian nurses 既，其實幾親切。不過，不論間醫院平時幾好，幾多專業既醫生，護士好忙(其實都理解）去到身體咁唔舒服既時候，無野比得上家人喺度既支援同探望。慶幸還可以探望，慶幸英國喺疫情中的人性化。