迎接香港家人篇

仲有幾日我家既三寶（父母同外婆）就要到倫敦了，心情開始既緊張又興奮。外婆呢個8月喺香港做咗80大壽，有好多親戚都有出席，既係慶祝又係餞行，請咗個攝影師影相，聽講嗰晚大家都好愉快，笑容滿面，就連做樓面既阿姐都話呢兩年好少見啲客咁齊整又咁開心。我問阿媽，有無啲離愁別緒，佢話，有就一定有，但係大家都用笑容掩蓋了。

回想起從BNO 簽證話推出開始到考慮移民，考慮賣樓，又諗返轉頭，又再次下定決心，都不過係一年多啲既事。幾個月前申請visa搞咗幾晚，最擔心係外婆既簽證不獲批准，但好彩好順利。到安排好哂家人既簽證就到搞自己，但可能因為我既簽證係喺英國申請，搞咗兩個半月先批。曾經都擔心會唔會屋企人個個都黎咗英國，然後我無得留低當然機會率係好細，但同Home Office 交手咁多年，唯一最清楚係一日未有簽證，一日都無100% certainty。

仲有幾日佢地就上機了，總覺得呢兩年香港人經歷咗好多，我諗好多人都無諗過今日會企喺呢個點，告別出生地、家人、朋友，告別一個滿有愛又滿是催淚與傷痕既地方，向著新既生活進發。未知固然可怕，但已知又既定既事又何嘗不可怕。

今日星期日，三寶最後一次返教會崇拜，希望佢地唔好瞌眼瞓 (話晒都最後一次), 然後我希望佢地心裏滿有平安，踏上征途！

下一篇：外婆要移民 https://www.bnopathway.com/post/外婆要移民