英國聖誕習俗之聖誕咭篇

如果大家喺英國，最近又去開郵局，都知呢個時候郵局非常忙碌，英國人趕住寄聖誕咭、聖誕禮物出國。

送咭既文化喺英國很根深蒂固，剛黎到英國很難想像一間只係賣咭既店可以喺很貴既地段生存到，我成日覺得呢啲店遲早會執，就好似香港啲文具店。但住耐咗，發覺呢啲咭店都幾受歡迎，機場、火車站一定有一兩間，好多high street都會有，賣幾鎊一張。

我發覺原因係英國人就係鍾意寫咭，佢哋認為送咭係表達心意既最低限度，所以唔可以唔送。聖誕節咁重要既節日，大家都會好認真去揀，我們家平均每年花£30喺買聖誕咭上。

第一年喺英國過聖誕時，我知道要送聖誕咭俾英國男友(現老公）家人，去Tesco 買咗一包10張嗰啲，諗住都ok，但係唔得。英國人對送咭呢件事好執著，因應你同對方既關係，買既咭會唔同，除咗Dad, Mum, Sister, Brother, Grandparents, Uncle, Aunt, 仲有 in-law (我奶奶、姑仔）。仲未計因父母離婚再婚而有step-parents 同step siblings ，佢地都需要收咭。如果係再婚既情況，你未必會買Dad咭俾你既後父，就正如我送唔出Mum咭俾我既奶奶，呢啲情況你可能買general christmas 咭就可以，但都要係切合對方既喜好同style，唔會亂送。如果係同事、上司、鄰居一般既general card就可以了(話說我都見過送俾竉物既咭)。

每年寫咭我都諗好耐，以前剛開始學呢個文化，以為寫多啲就好（非常小學生思維），下下寫個千字文出黎。後來知道喺英國無人咁做，寫咭貴精不貴多，寫太多對方覺得你好奇怪，一句講唒it’s not cool！英國文化，每日學習中。