英國母親節

下星期日3月14日係英國母親節。每年呢個時間都會買定張母親節咭等5月香港母親節寄返香港。有一年試過3月唔買住，結果到5月係周圍都搵唔到咭，所以依家都會買定先。

之前寫過一篇關於英國送聖誕咭文化的重要性 (https://www.bnopathway.com/post/英國聖誕習俗之聖誕咭篇)，大致講過對英國人黎講，禮唔到、人唔到，至少咭要到既呢個logic。所以你黎英國會發現很多high street 都會有賣咭的店，機場、火車站都一定會有一間，俾travelers 可以好方便帶張咭回家。

以前剛搬到倫敦喺city 返工，覺得一條街竟然有兩間賣咭店係好神奇的事，租金咁貴喺點生存既？但後來見到lunch time 都幾多OL去買，而且辦公室總會有人升職、離職、生仔，呢啲都需要送咭，喺樓下就有一間店，又真係好方便。黎到英國後返既第一份office 工，我既部門很大，但每個人生日都會送一張有全部人簽名既咭，我到依家都保留住，雖然大部分人既名我都唔認得但覺得幾特別。

講返mother’s day, 往年會同老公既家人過，出去食個飯，今年仲喺lockdown 中所以都無得好好慶祝，餐廳都未開返。不過，我見很多online shops都promote 緊mother’s day deals, 大概都會有好多英國人, 包括老公會online shopping 寄禮物。人見唔到，至少禮到嘛。又因為英國人對送咭既重視，我都會大時大節寄咭返香港，反而以前喺香港住就好少送，可能真係入鄉隨俗啦。