自摸食糊 - 英國移民奮鬥篇

早幾日同一個好朋友傾開，佢攞住伴侶簽證(spouse visa)既，問我係咪打算申請BNO visa，我話係呀。

好幾個月前寫咗篇<為什麼要把握BNO visa 移民>既文章，我講到好多居英港人近幾年(準確啲講係2012年後，前首相Teresa May 取消咗Post Study Work Visa 之後）所遇到既問題，以及BNO visa 對我們呢班人有咩意義。

未有BNO visa之前想留喺英國係好難既，大概分三條路：讀書、結婚、工作簽證。讀書本身，即使你讀博士，都無得直接拎到永居；結婚靠伴侶簽證，同很多工作簽證一樣，都係每2年半renew 一次，5年後可以攞永居。

困難在於很多人都搵唔到願意俾work visa 既工作，而結婚有很多考慮同壓力。個壓力在於把結婚同簽證兩件事放一齊會有利益既問題。

「好似搞到我係為咗佢本passport 先同佢一齊。」

「以後鬧交，佢可以話如果當初無我，你都留唔得底啦。」

「我攞到個spouse visa嗰日，你知唔知我landlord 點同我講，佢喺我老公面前話: 以後你老公就係你既boss 啦！你估我點應佢？我話：咩呀，大不了咪搵份工sponsor 我visa 囉，大不了我咪去第二度做野囉，唔一定要靠佢架。」

以上既對話喺我以前訪問啲香港人時紀錄落黎既，紀錄咗香港女生對於靠結婚移民英國既感受同矛盾。因為喜歡一個人所以一齊，因為咁決定留喺英國，因為搵唔到sponsor visa 既工作而自信心不足。因為要靠伴侶先可以留喺英國，怕變成只能依賴別人的自己，又怕結婚後因為visa 而處於弱勢地位，鬧交都少咗份氣勢。

咁多既擔心，咁多既情緒，咁多既文件準備。

最後，竟然係自摸! 唔駛靠人出沖，靠自己申請 BNO visa 而可以留喺度，實在係太好了！其實香港好多女生都幾獨立的。

希望不只喺香港既大家申請成功，喺英國而打算轉 BNO visa 既各位都一切順利！