拜山呢件事

清明節剛過，我喺香港既家人通常都唔會正日去，反而會過咗無耐去。前嗰排寫咗篇係關於喺英國拜祭先人，講到我對於未來好難有機會喺香港齊齊整整一個家族去感到可惜，仲講到諗起以前喺高考中化科有條題目係關於代客買花的，然後我依家對此既感受。

因為細個係外公湊大，所以感情好深，每年返香港一定會去拜一拜，花一定去旺角花墟揀，最鍾意買太陽花加啲襯花，紫色既毋忘我就特別喜歡。雖然屋企習慣唔燒衣，但油雞、叉燒、飲品會照買（到最後我們自己食唒😅) , 再一家人去飲茶。所以，其實係一家人既social 活動。

一兩年前帶英國先生返香港，順便又上一上山，第一次參與我們既呢個特別活動，佢話都幾感動，佢自己喺英國無咁既經驗，但同我地一齊做呢件事既時候，佢覺得雖然已經過去好多年，但已經唔喺度既人仲係一直被記掛的，呢個位好觸動到佢。當然，有得食呢件事都幾特別🤣佢又無咩禁忌concept, 所以都幾enjoy 整個過程。

早嗰排去Chester 幫客人收樓，去既途中收到家人既訊息話佢地今日幫我auntie 執屋、整理行裝，準備離港。我諗到既係我喺英國幫香港家庭定居既時候，其實同一時間我自己既香港家庭都互相幫忙，為移民做準備，有啲感動、有啲無奈，又會希望自己都可以喺香港幫到手。幫唔到，又會有啲難過。就好似今日香港家人約咗去拜阿公，其實我都好想可以喺度，但現實做唔到。

遲下想喺自己既garden 到買張memorial bench (我之前個post有講到), 咩清明重陽，春夏秋冬，都可以坐喺張bench 度想念下，食下叉燒，都唔錯。