平安夜的思念

移民英國後，每年聖誕節or 任何重要節日，包括自己生日都很少同香港既家人朋友過。無計啦，一年最多返香港一次，總唔可以太貪心，而且學啲人話，食得鹹魚抵得渴，鬼叫你去咗英國咩。其實一般都好接受到，一年見一次，瞓前同香港家人講早晨，起身miss 哂所有香港朋友間既對話，通常返到香港行程排得滿滿的，很多人要約要見tick哂啲schedule 後，好似好滿足又好似好空虛，但空虛唔到好耐，已累到喺機上瞓著。一年又一年。

今年因為Covid 又因為家人明年移民安排，計落將會喺我移民英國後最耐無同香港家人見面既時期，如一切順利，大概會有一年半無見。

幾時最掛住家人呢？通常係睇到人地有家人陪，有家人一齊慶祝聖誕時最掛。我好幸運，通常有老公既家人陪我過節日，對我呢類同英國人結婚既女生黎講，啲人時時提喺咀邊既”佢既家人就係你既家人”係真架喎，我可以依賴的、時時見到的，咪就係佢既家人囉。

只係有時，通常只係一下，聖誕節同老公既家人圍在一起食飯，食完我mother in law會同我sister in law 唱k (係, 英國人都好潮), 啲男人食cheese 飲紅酒，小朋友自己去玩 (以前要陪玩），我會特別想念香港既家人，想同屋企人打麻雀 （雖然通常都輸）。

其實無咩既，知道總會相見，總係有期盼，有幾遠啫，飛13個鐘就到啦，天涯若比鄰嘛。不過，一個Covid 已經增加咗travel 既難度，返去都物是人非，喺咁既大環境下，香港既家人都打算過黎了。

過去呢7年好多謝老公既家人（雖然佢地唔識睇中文)同喺英國既親戚，令我不感到孤單，堅定走每一步。佢地既幫助俾到我信心同勇氣帶著家人明年往英國開展新生活，亦令我覺得可以幫到其他香港家庭係一件好開心既事。可能黎到無得再每日飲早茶，可能從此再無距離美，但下個聖誕新年希望大家團聚於英國。

今日2020年平安夜，祝願大家平安喜樂！