安全意識既反思

最近倫敦因為年輕女子Sarah Everard 晚上回家途中被拐帶並謀殺既事件，引起廣泛關注，新聞不停播，都令我反思一下罪案率既問題。早幾個月寫過一篇同罪案率有關的，分享過被賊人跟蹤意圖偷手機既經歷。

無何否認，身邊住倫敦既香港朋友大多都有被賊人target 既經驗，可能係因為Chinese 樣，都可能係我地既安全意識唔高。總之，男女都可以被target 架，我以前有個日本人flatmate, 佢帶咗個Tinder對象返屋企，被人偷咗部電腦，案發時我地啱啱返到屋企，個賊見人多走得好急，無機會偷埋我擺喺廳既電腦。

喺倫敦或者其他英國大城市，每個地方都有我地叫做dodgy area, 意思係唔好既，有危險既地方。即使你住好區，都好難避免一世唔去嗰啲dodgy area.

以前同老公喺香港，佢成日見我個手袋無拉鍊，可以睇到哂裏面啲野，佢好緊張🤣唔明點解可以咁大膽，因為喺倫敦你背個咁既袋行到去dodgy 既地方，一定被人mark 。

安全意識呢樣野大部分香港朋友係從經驗中學返黎既，慢慢你會注意到每條街既氛圍都唔同。行入一條街，突然個氣氛轉咗，有幾個人行行企企又好似唔係做野，東張西望的，你就要提高警覺了，可能係無野，但小心為上。

講返呢宗謀殺案，受害者30幾歲，好多女性都打去電視台講自己深夜回家既時候遇到既經歷。我諗返自己黎到英國後確實少咗出夜街，啲店又早關門，冬天夜晚又凍都唔想喺外面，唯一會夜返就係去完某朋友home party 之後，如果過咗公共交通服務時間，一係坐Uber（但貴), 一係留到第二朝。如果得自己一個返屋企確實唔似喺香港有既嗰種安全感。最後，喺英國係唔可以買防狼噴霧既（不合法），但如果你真係偶爾自己一個要夜返，可以帶枝travel 裝既hair spray，細細枝，對準眼一樣有用。希望大家黎到英國出入平安！