外婆要移民 - 申請簽證篇

自從寫咗<外婆要移民>後，偶爾都會有人問我外婆申請咗簽證未呀，因為我地唔係好急，所以都等二月嗰批過哂先行動。

但其實父母連同外婆都一直慢慢準備所需要的文件，包括去私家醫生度攞張醫生紙，證明外婆有咩長期病，服食咩藥物，喺生活上如何依賴我地。

3月18號去做TB test, 外婆事後同我講話好多人排隊等，好唏噓。外婆個肺係花既，但因為一年前做過一次身體檢查照過肺，睇到都係同一個位花咗，所以就唔需要再做吐痰化驗。

4月7號父母連同外婆攞到TB test certificate，可以開始申請visa，但因為自己平時工作忙碌，都係直到最近先可以協助佢地申請。事前父母睇過好多YouTube, 我自己睇過Home Office website 同ID check 個app 有咩要注意。

5月9號母親節，我預留了一整天既時間用WhatsApp video call 幫佢地申請。因為父母都有BNO passport, 而佢地自己事前準備好文件同列哂過去10年既travel history, 所以幫佢地申請尚算順利。但即使準備工夫做足，前後都用咗7小時先完成兩人的申請。原因大概係同technical issue 加上心急做錯事有關😅 但做到外婆嗰度就出事了，先前已知道20xx前的特區護照scan 唔到個chip。而外婆本身既passport 亦到期，所以要renew。以為renew 咗就scan 到個chip, 但結果唔得，試咗三次，俾個app blocked 咗，話要24小時後先可以再用。當然大家都有啲失望，本想一次過做哂，但唔得。不過，我覺得搞咗咁耐，大家都累了，所以唔緊要，第二日再做啦！

之後既3日，我都喺英國時間上午八時，香港時間下午三時，搖距同父母幫外婆申請visa, 結果都係唔成功。第一日我父母好緊張，因為之前失敗過，一去到用app嗰個位，大家既聲音開始提高，開始緊張，我又睇唔到發生咩事(佢地無咁high tech 識用Skype or zoom 既share screen function, 只係用電話WhatsApp video call, 一緊張佢地就放低個電話，所以我只係見到一片黑😂) 就係咁唔知點解，每日都俾app blocked。

到後來，我都緊張了，因為根據home office website, 所有dependent 都要喺主申請人申請後既兩日內提交佢自己既申請。到5月12號上午又被blocked, 今次既原因我懷疑係因為我地未夠24小時又試過(可能差一小時?)

結果當日我下午5點先工作完(香港時間已凌晨)可以再同佢地試一次，都係唔成功，所以唯有用去visa Centre 既方法, 因為同用BNO 有少少唔同，我地都好小心花左6個小時完成申請。完成嗰刻，香港已天光，我阿媽話以前考會考都無試過咁夜瞓😂 搞掂哂，佢地可以同外婆去飲早茶。

今日5月17號book 咗去北角交資料，事前影印哂hard copies, 都算順利，外婆打指摸比較耐，但都搞掂。到今日，終於鬆咗一口氣。

唔知道有無人係好似我咁long distance 幫家人apply BNO visa, 我覺得其實都唔難，係要有耐性，同唔好心急，唔好一緊張大家既聲線就越來越高😅希望大家都申請順利，早日獲批❤️我都可以早日喺英國同家人相見🤞