外婆要移民

小時候係外公外婆湊大的，特別有感情，外公十幾年前不在了，外婆到現在都同我父母同住。過去半年講到移民，都會諗咁外婆點呢？外婆雖然差不多80歲，但身體幾好，好有中氣，仲可以過年整24底年糕。

英國近幾年也去過好幾次，倫敦同愛丁堡都去過，因為有家人喺度住。

外婆喜歡英國的花園，夏天時會種下花。不喜歡英國的食物，有得揀一定要食中餐。覺得洗碗機都係信唔過，堅持手洗。

每年夏天黎英國一兩個月的外婆，到底可唔可以真係喺度住呢？無得日日飲茶又真係得唔得呢？

我們呢個extended family 有傾過，最後結果係因為所有子女都會走，所以外婆好有機會會跟隨。但係，移民咁大件事，每個家庭成員都應該有say, 每個人既睇法同感受都係重要既。問外婆既話，佢係答「你走我就走」(you jump I jump啲friend)。

答就係答咗，但我心裏面仲有啲不安，會諗好多，其實會唔會係我地走，佢根本無得揀？就好似有得揀只想食中餐？有得揀都會想子女都喺香港？

但人生有幾多時係真正有得揀？

有時候都會諗太祖父母當年可以揀留喺廣州，可以揀落香港，揀咗香港，又有咗一代一代，當年佢地落既決定，影響以後既好多人。外婆依家80歲，還可以跟著我們再走一走，其實可能都幾大意義。

呢兩日同外婆視訊拜年，佢話最近買咗對新波鞋，打算黎英國著 牀下底啲舊衫都唔要啦，帶啲新啲既黎到著(都係舊，但舊之中新啲既）突然覺得其實外婆可能比自己想像中更有心理準備，無論喺邊，可能對佢黎講，只要一家人喺一齊，佢就係幸福既。祝大家一家人平平安安、移英順利！

外婆要移民的後續：【移民的決定】