在英國悼念先人

尋日英國Covid 感染人數再創高峰，呢幾日英國又忙住脱歐，喺一片低氣壓中好難唔受新聞影響，但同時喺lockdown 中大家似乎都keep calm and carry on.

此情此景，我任由自己天馬行空去諗啲完全唔相關既野，保持幾分冷靜同希望。事實係，明年一月 BNO visa 開始接受申請，如果能走能飛，我最親既親戚都會走哂，咁拜山點呢？唔通真係請人代拜？

咳，記得十幾年前讀中化科，都有條題目係關於請人代拜山或遙距視像拜山既問題，記得當時我既睇法係幾firm - 覺得唔夠有心，估唔到今日因為家人移民要再諗諗。

我們家係唔燒衣紙，但會買雞、燒肉、鮮花悼念先人。我每次回港都會去拜，花一定親自去旺角花㠊揀。總覺得大家移民後再齊齊整整去做呢件事有啲難度，畢竟唔係所有家庭成員都會去英國。

我諗到一件事。剛移民到英國，有一次行公園，見到有啲memorial bench (紀念木椅)上面有先人既名字，通常係咁既 In memory of John Smith 1945 - 2018, 有時會加多句who loved this view (生前喜愛呢度既風景)。呢啲木椅喺public space ，大家都坐得。我第一次見到呢啲木椅時都幾感動, 雖然唔識呢個人，但坐喺度可以講得上大家喺唔同時空睇見同一個景象，都幾浪漫既。

不過我外公無喺英國住過，自然講唔上有邊個景特別喜歡。做下research 發現呢啲memorial bench 都有好多英國人買黎放自己garden 做個念想，我覺得呢個idea 都得，第時買啲燒肉，坐喺張bench 度喺自己garden 想念一下，都幾好呀。唔燒衣又唔會打擾到鄰居。不過，唔知可唔可以刻中文，中文始終有feel 啲。

呢啲無厘頭既諗法同大家分享下，可能家中長輩都未必buy, 不過係我既一個念想。