倫敦考車成功篇

尋日終於係考車日，喺之前一直都好緊張，考之前幾日一度覺得壓力超大，喘不過氣，呢個可能係同我之前學車既經驗有關。我寫過一篇<我離開香港前未做的一件憾事>，當中就係寫學車，內容喺呢度就不重覆了，大概就係關於我第一次2015年喺倫敦學車遇人不淑，最後搞到上法庭。之後搬到Scotland, 又因為仲有case 喺身，所以一直都提不起勁再去學。直到搬返倫敦，搵咗個女師傅，越南華僑，先開始有信心再學，但呢個師傅感覺上係非常惜車之人，我覺得佢喺好多堂後對我既信任仍然不足，會經常幫我控制個wheel。然後生活忙起來，又不想學，到想學既時候又Covid，無得學。

終於有日睇睇之前考既theory test, 仲有幾個月就到期 (兩年expire)，過咗又要重新考過先可以考路試😭😭，左諗右諗都係要考，主要係覺得自己由2015年開始學，不管結果係點都要試，當係對自己既一個交代。到我想book 期考既時候，發現排到明年😱，只能日日㩒refresh 睇下有無近一啲既期，最終都搵到呢個期，但係我theory test result只係valid 到11月初，即係呢次fail 咗就又要重新考筆試，得咗先可以報路試。Book 到期，搵返先前既師傅，佢已經有太多學生不再收生。

重新搵過幾間，發覺都好full 下，可能真係Covid 期間delay既依家都趕住考。我搵到既driving school assign 咗一個師傅俾我，男師傅，係黑人Muslim。第一堂我就同佢講我先前既經驗，佢表示理解，同佢上過咁多堂，佢都非常尊重我，犯錯不會鬧，最重要係即使幫我turn the wheel, 都無掂到我。上第一堂前我都有諗，又係男師傅，我得吾得？然後係我先生提醒我，真係唔好因為一次既經驗就認定所有男師傅都係壞人😅而且佢話以佢既經驗黎講，”真正”既Muslim 其實係好尊重女性，絕對不會碰太太以外既女性。事實證明，呢個師傅係最適合的。

尋日11點開始考，我師傅9點已經黎接我，再俾我練多陣。考官係女人，開咗半個鐘到話可以停了，然後佢話我pass! 有四個minor faults😭😭 我超開心，真係無諗過會pass😅 然後又諗返2015年自己既經驗，真係好想大聲同嗰個超衰既instructor 講 fxxk you。最後，想同大家講千萬唔好俾一次唔好既經驗阻擋自己前進，即使係慢慢黎都好，一點一滴累積起來既信心，有朝一日都會成為成功既基礎。