你的名字 我的姓氏 Name & Title

之前寫過一篇短篇的關於香港人既英文名，以及我以前既英文名如何增加咗我喺職場上的煩惱 https://www.bnopathway.com/post/港式英文名-get-a-proper-english-name

關於姓氏，其實都可以講講。不過每人經驗不一樣，我只係講下我既睇法同經歷。我既先生係英國人，求婚後，為到我結婚後跟唔跟佢姓傾咗成年，佢既家人同我既家人都有俾意見。

我自己起初既諗法係唔跟，原因係我身邊既家人同朋友結婚後都保留自己既姓，我覺得大家都咁做，似乎無咩必要？其次，改名好煩，要先改哂香港身分證、護照先可以改英國呢邊既證明文件，仲有銀行、保險，一改要改好多。

但係喺英國，我都幾有信心講locals中至少7成女性結婚後會從夫姓，係好common 既practice。如果將從夫姓呢件事同性別平等既議題掛鉤，可能會覺得香港仲平等。

但當我同英國既朋友講起可能唔改姓了，我會感受到少少壓力，就好似我覺得喺香港唔改姓係好common，佢地覺得咁係好奇怪既事。

到最後，真正令我改變心意有兩個原因。第一，老公既家人有一個concern, 第時如果要接小朋友放學，我個姓同小朋友既姓不同，老師會需要小心啲make sure 我真係小朋友既家長。(當然，也有很多英國人不結婚但有小朋友，咁父母既姓都會不一樣。) 其實呢個原因事後再回想都唔係話一定會造成咩好大困難，但當時覺得我英國既in laws可能有佢地傳統既諗法。

第二，我見久唔久老公又問我跟唔跟佢姓，有次我話好啦，咁就跟啦（其實心裏未決定好），但佢聽完後超開心。我問佢乜你好介意我唔跟你姓咩，佢話咁當然尊重你既諗法啦，但如果你肯跟，我會好開心，畢竟呢邊大部分人都會咁做。

最後講一個小插曲，上年回港，去銀行排隊改名，老公陪我去，個員工對哂資料，幫我填form, 個title 嗰欄個員工填咗Miss, 俾我老公睇到，我見後面都多人排隊，我話不如算啦，佢話咁喺英國都幾unacceptable, 既然改姓，個form 又要寫你marital status, 當然個title 要係Mrs 啦。結果只能同個員工講，點知原來一個mistake 要重填過張form, 後面既客只能再等耐啲。不過經此一次，我老公都明白喺香港大家都不太理你係Mrs, Ms 定Miss 連銀行都係咁，更何況其他？同英國真係好唔同。Miss 係指未婚的，Mrs 係指已婚的女性，Ms比較tricky, 未婚已婚都可以用，但係business 環境，當你不清楚呢個女人喺已婚定未婚，你可以address 佢做Ms